2026 йил январ ойидан Қирғизистон Хитой билан халқаро автомобиль юк ташишларда e-Permit электрон рухсатнома тизимига ўтди. Бу ҳақда Транспорт ва коммуникациялар вазирлиги хабар берди.
Маълум қилинишича, мазкур тизим доирасида маҳаллий автоташувчилар аллақачон Хитой, шунингдек Ўзбекистон, Озарбайжон ва Туркия билан юк ташишларни электрон рухсатномалар асосида амалга оширмоқда.
E-Permit (Electronic Permit) — халқаро юк ташишлар учун рухсатномаларни бериш ва текшириш жараёнларини автоматлаштиришга қаратилган электрон платформа ҳисобланади.
Вазирлик таъкидлашича, e-Permit жорий этилиши рухсатнома ҳужжатларини алмашиш жараёнини сезиларли даражада соддалаштирди. Ташувчилар эндиликда ҳужжатларни онлайн тарзда расмийлаштириши ва топшириши мумкин, бу эса навбатларда кутиш ва шахсан мурожаат қилиш заруратини бартараф этиб, хизмат кўрсатиш муддатларини қисқартирди.
Аввал томонлар ҳар йили рухсатномаларни қоғоз шаклида алмашар эди. Хусусан, 2025 йилда Қирғизистон ва Хитой ўртасида 130 мингта рухсатнома алмашилган бўлиб, уларни тайёрлаш ва етказиб бериш бюджет харажатларини талаб қилган.
Вазирликка кўра, e-Permit тизими шаффофлик ва қулайликни ошириш, бюджет харажатлари ҳамда коррупция хавфларини камайтириш, шунингдек халқаро автомобиль ташувларини ривожлантиришга қаратилган.
2026 йилда электрон рухсатнома тизими жорий этилиши натижасида давлат бюджетига 500 миллион сомдан ортиқ маблағ тушаши кутилмоқда.
Эслатиб ўтамиз, 2025 йил октябрь ойида Қирғизистон Республикаси Вазирлар Маҳкамаси Хитой билан ҳамкорликда e-Permit тизимини ишлаб чиқиш ва ишга тушириш учун 7 миллион 900 минг сом маблағ ажратган эди.
